सिलगढी देवकोटा संघको ५८ औं प्रतिष्ठा दिवस समारोहको उपलक्ष्यमा विविध कार्यक्रमहरु माझ प्रमुख अतिथि वरिष्ठ साहित्यकार नरबहादुर दाहाल, विशिष्ट अतिथि सरोज गजमेर, आई० पी० एस० ( भूतपूर्व आई० जी०, पश्चिम बङ्गाल सरकार), खरसाङ विधानसभा समष्टि विधायक बी० पी० बजगाईं, संघका अध्यक्ष मिलन रुचाल साथै अन्य वरिष्ठ साहित्यकारहरुका बाहुलीबाट संघका ऐतिहासिक मुखपत्र “बाडुली” – को नयाँ अंकको लोकार्पण सम्पन्न भएको छ ।
सन् १९६३ सालमा सिलगढी देवकोटा संघको स्थापना भएपछि सन् १९६८ देखि बाडुलीको सुरूवात वरिष्ठ साहित्यकार रामलाल अधिकारीले गरेका थिए । नेपाली साहित्यको क्षेत्रमा बाडुली पत्रिकाले आफ्नो निरन्तर योगदान दिँदै आइरहेको भए तापनि सन् २०११ देखि यता कतिपय कारणवश बाडुली को प्रकाशनमा गतिरोध आएको थियो । सिलगढी देवकोटा संघको २०२०-२३ कार्यकालको कार्यकारी समितिको पुनर्गठन भएपछि संघको साहित्य अनि शिक्षा विभागले बाडुली को पुनः प्रकाशनको दायित्व लिएको थियो । संघका साहित्य विभागको अथक प्रयासमा “बाडुली” को वर्ष ५३, अंक १ -को सफलतापूर्वक प्रकाशन अनि लोकार्पण हुन सकेकोमा साहित्य विभाग, सिलगढी देवकोटा संघको पक्षबाट सम्बन्धित सबैलाई धन्यवाद ज्ञापन गरिएको छ ।
कार्यक्रमबारे जानकारी गराइएअनुसार उक्त अवसरमा सदस्यता ग्रहणको २५ वर्ष नाघेका आजीवन सदस्यहरू, संघको भवन निर्माणमा सहयोग पुऱ्याउने दाताहरु, समाजका विभिन्न क्षेत्रहरूमा योगदान दिने सामाजिक संस्था – भानुभक्त समिति, पृष्ठभूमि कला संस्थान साथै व्यक्तिहरु गोपाल लामा, कृष्ण लामा, गायक कर्मा शेर्पा, यंग साइन्टिस्ट वर्षा रानी गजमेर आदिलाई सम्मान एवं संवर्धना जनाइयो |
कार्यक्रममा “घर घरमा मातृभाषा” विषयमाथि चर्चा पनि राखिएको थियो | चर्चाका निम्ति प्यानलमा – डा० रेमिका थापा, साहित्यकार विजयकुमार राई, डा० धनीराज छेत्री, शिशु विशेषज्ञ डा० मधुलता पाण्डे आदिको उपस्थिति थियो भने वार्ताको सहजकर्ताको भूमिका नारी विभागकी संयोजिका श्रीमती देवीकला शर्माले गरेकी थिइन् |
अञ्जना भण्डारीद्वारा सञ्चालित कार्यक्रममा चर्चित गायिकाद्वय स्नेहश्री थापा अनि सान्निध्य थापाले भजन साथै संघका सदस्य किरण घिमिरे, अनि सुजन तामाङले गीत प्रस्तुत गरेका थिए |
