संवाद प्रतिविम्ब
दार्जीलिङ 29 अगस्त ।
गत दिनाङ्क २७ अगस्तको दिन स्थानीय साउथफिल्ड कलेजको रोटारेक्ट क्लबको नयाँ समितिको सञ्चालन अनि शपथ ग्रहणको निम्ति एउटा सभाको आयोजना भयो। यस कार्यक्रममा प्रमुख अतिथि कलेजका प्राचार्य डा अनुराधा राई अनि विशिष्ट अतिथि रोटरियन स्वेता च्याटर्ची अग्रवाल उपस्थित थिए। यस सभामा क्लबका पुराना समितिले विगत वर्षमा के कस्ता कार्यक्रम अनि परियोजनाहरू सम्पन्न गरे भन्ने जानकारी अध्यक्ष दिक्षा कार्कीले गराए।
सभामा २०२२- २०२३ कार्यकालको निम्ति सुश्री याङछेन डी भोटिया अध्यक्ष अनि सुश्री गुलशन आरा सचिव साथै अन्य पदाधिकारीवर्गले क्लबमा निष्ठापूर्वक कार्य सञ्चालन गर्न शपथ ग्रहण गरे। कार्यक्रममा रोटरियन अमरसिंह राई, जोर्डन नर्बु, अमित जैन, रूपेश प्रधान, जित प्रधान आदि उपस्थित रहेका थिए साथै सन्त जोसेफ कलेज साथै ज्ञानोदय निकेतन विद्यालयका विद्यार्थीहरूको विशेष उपस्थिति रहेका थिए भनेर प्रा सदीप प्रधानले एउटा विज्ञप्तिमा जनाएका छन्।
